* سباق تسلح الكريدرات في دولة الإمارات :

* ببساطة من هنا البداية :

* عندك سائق كريدر معلم , تملك 50 ألف درهم , توجه إلى ياسين أو النورس وأحصل على كريدر

* للدخول بتفاصيل الموضوع :

- أنت الآن قادر على إمتلاك ( كريدر ) حسب ما تختار أنت وعلى الأغلب H14 - caterpillar
أمريكي موديل فوق الـ 1985 , ثمنها كاملاً قد يصل إلى ( 300 ) ألف درهم ما يعادل ( 3900000 ) ل س
ولكن بعدة شروط :

أولها : أن يكون لديك سائق محترف ( معلم ) أو أن تكون أنت نفسك السائق
ثانيها : أن تملك القسط الأول تقريباً / 50 / ألف درهم وما فوق , ما يعادل 650 ألف ليرة سوري تقريباً
ثالثها : أن تتوجه إلى إحدى المؤسستين ( ياسين - النورس ) وجماعة الفرقلس في مصفح أبو ظبي
على إطلاع على التفاصيل الكاملة للإستشارة والسؤال ......يبقى عليك بعد الشراء أقساط شهرية
ما بين 7000 درهم إلى 10000 درهم أي مابين /90 / ألف ل.س ... إلى ... /130/ألف ل.س .
لتبدأ مثل ما بدأ الشباب مسيرة طويلة بالعمل للوصول بالنهاية لواقع ملموس لا غبار عليه وهو أنك
تملك ( والملك لله ) كريدر حسب الموديل .

وللتوضيح لا بد من ذكر النقاط الهامة التالية :

1 - سؤال لابد من طرحه وهو هل موضوع الشراء فيه شئ من الشبهة , وأكيد السؤال للمهتمين
بموضوع الحلال والحرام

2 - تسمع الأخبار من الشباب منهم من يقول إذا كان معك مصاري بوجهك لعند ياسين أو النورس
وأشتري فوراً الشغل كثير وخلال سنتين بيكون عندك كريدر شو بدك أحسن من هيك ومن شغلها
بتدفع القسط الشهري وفي شهور بتتأجر بأكثر من 20 ألف درهم ما يعادل اليوم 260 ألف ل.س
ويتابع في الكلام وهوي مبسوط وسعيد وهوي عم يحكي عن مشروع كبير وكبير كثير وهوي
مشروع العمر ............. فجأة ............. الشخص ذاته وربما بعد ساعات أو ثاني يوم
يقول لك وبملئ الفم لأ لأ لأ دير بالك يا عمي هيك مشروع بيكسر ظهرك والله إذا ما كنت خرج
ثم يسألك السؤال المقشعر للبدن ويقول :

طيب بدي أسألك إذا وقفت الكريدر عن الشغل شهر أو شهرين أو ضربت بيها طرنبة الهدرليك
أو كسر فيها شي أو حدا ( حطلك شي شغلة بالمحرك ... ) وضرب المحرك شو بدك تسوي

3 - تتفاجئ عندما تسمع بفلان من الناس يملك ( والملك لشركة ياسين أو النورس ) على ثلاث
أو أربع كريدرات وببساطة وبسهولة يقول ( والله شايفلك يمكني بدي أسحبلي ثنتين جداد ) وكأنو
فعلاً عم يحكي عن شي فلينة بندورة أو شوال بيذنجين للمكدوس .

4 - الشخص ذاته المتحمس والداخل خضم التسلح الرهيب وعنده كريدرين أو ثلاث وناوي يشتري
واحدة و اثنتثن جدد ( كريدرات طبعاُ ) تتفاجئ بهذا الشخص صاحب التاريخ العريق بالكريدرات
يستنجد بالربع في الفرقلس ليرسلوا له القسط أو ليصلح الأعطال عنده

بالنتيجة الموضوع تمت كتابته للإطلاع على مناخ شراء الكريدرات
حتى إذا سمعت فلان عنده ست كريدرات ومدحلتين ولوبد ومدري شو لا يروح فكرك لبعيد

- أكيد إنشاء الله يسدد الأقساط في أسرع وقت وبيملك على الكثير الكثير فلسنا من الحاسدين
والله سبحانه وتعالى يطعم كل مشتهي .

- بس بالنتيجة وبعد السؤال والإستفسار عن الأحوال صدقاً وبدون مبالغة اللي عم يشتغل
كل شهر بـ 3000 إلى 4000 درهم أحسن من هالخربيطة هاي كلها

ولابد ينطبق قانون : ساقي جارية ولا نهر مقطوع ........... مع التحية

شكرا يا اخ challenger

ولكن اذا كان السائق هو صاحب الكريدر اكيد المسألة مربحة وجيدة
اما اذا كان عندو او جايب شي سائق نكبة (بعيد عنكو) او صاحبها مابيعرف يدير شغلو فعلى الكريدر وصاحبها السلام

موضوع روعة تشالنجر

تاريك مانك سهل بالانشاء

و بالنسبة للموضوع

بيقلك اللي من ايده الله يزيده

و التجارة ربح و خسارة

الله يباركلهم جميع

بالمناسبة

الاسعار اللي انت كتبتها اسعار السوق الحالي و لا قديمة

بتعرف الشغلة صار بدها تفكير

و بيقلك المثل

ساقية جارية احسن من نهر مقطوع

و انا بقول

نهر مقطوع احسن من ساقية رح تنقطع بالايام

لانو ماحدى خللد بالغربة مرجوعه لبلده

فصيد صيدتك و اهرب

* منورين بالمرور الطيب ابن الفرقلس وأبو هارون

* الأسعار طبعاً هي الموجودة حالياً حسب ما بعرف ومن بعد كثرة سؤال

* واللي يا أبو هارون بدو يصيد صيدتو ويهرب رح يتفاجئ بأنو

بعد ما صاد شربك بالمصيدة قبل كل الناس لأنو علق وغير الله ما عاد يطالعو

إذا ما اشترى فهوي خارج السباق بطبيعة الحال لكن إذا اشترى صدق ما عاد

يخلصو منها غير البيع والرجعة للبلد أو يظل متشربك بخيوط اللعبة

هوي ع الحالتين رح يرجع انصاد او ما صاد فخليه يصيد و يجرب

لانه بالحالتين مشربكة الامور لالالا

و لا شو رايك

يعني لو مو مشربكة كان تغرب من اصله
بكاء

عدل سابقا من قبل في 2/14/2008, 13:18 عدل 1 مرات

تحياتي للجميع اذا سمحتو اعلق على الموضوع

ولو انو شوي جاه متاخر لكن المثل يقول (ان تحظر متأخر خير من ان لا تحظر)

في البدايه الشكر لchallenger الي فتح الموضوع

ولو انو في بعض الأخطاء ولكن الزلمي عمل جهد يشكر عليه [list][*]راح ندخل بالتفاصيل وهي تقريبا صحيحه على ما بعرف وحسب معلوماتي *

اقتباس :: أنت الآن قادر على إمتلاك ( كريدر ) حسب ما تختار أنت وعلى الأغلب H14 - caterpillar
أمريكي موديل فوق الـ 1985 , ثمنها كاملاً قد يصل إلى ( 300 ) ألف درهم

يا اخي كريدر14H متل ما انت ذكرت قيمته وكاش 600 الف درهم وطالع لانو ال H موديله 1997 وما فوق *اما الي عم يشترو الشباب صدقني كلو تحت 1980 اي موديل G واكتر الي عم يشترو الشباب هو 140 وفرق كبير بين 14 و 140 وبعدين تخيل كريدر سعره كاش 250 الف بس الشباب (((-المساكين-))) عم يرضو بسعر 300 الف وانت طالع هذا موديل السبعينيات اما اذا كان موديلو فوق شوي ممكن يوصل 350 الف برياحه وصدقني كلها سكاريب من عند ياسين وغيره

.* بنجي لمرحله الشغل اذا الله يسر والكردر اشتغل _طبعا فرضا سائق عم يشتغل عليه

_وما صار اي عطل _وهذا صعب شوي على كريدر قديم_اخر الشهر الي بيطلعو الكريدر يا دوب يسد القسط واجار السائق .اما المصيبه اذا الكريدر عطل شو راح يصير بصاحبه ببساطه راح يلعن الساعه الي اشتراه فيها الكريدر لأنو مستر ياسين ما راح يصبر عليك والعقد الي موقعه معه والشيكات كلهم لصالحو وبيقدر يجيبك بأي مكان كنت

*وملاحظه اخره العقد بيشرط اذا ما دفعت شهرين بيحق له سحب الكريدر منك

وما بيرجعلك( الفيرست بايمنت )اي مقدم الدفع يعني انت خسرت رأس المال ورجعت على الصفر يا بطل

*النقطه الأخيره وهي اهم نقطه اذا لا سمح الله مات ياسين شو بصير؟؟؟

انا راح اجاوب وللعلم قلال من الي مشترين من عند ياسين بيعرفو هذا الشي

الأحتمال الاقوى ان تروح الكريدر !!!!!!طبعا اكيد انتو مستغربين وكل واحد سأل حالو ليش؟؟؟؟؟؟انا راح اقلكو ليش -

العقد الموقع بين الشاري وياسين غير قانوني

-ياسين ليس له الحق ببيع اي معده لانو القاعده القانونيه تقول -لا يحق لاي شخص بيع ما لا يملك- وهذا شئ معروف للجميع

- النقطه الثانيه العقود الموجوده مع الشباب غير مصدقه بأي محكمه او اي دائره قانونيه

وفي النهايه صاحب الشركه (اقصد الكفيل الاماراتي) راح يعطي كل شئ لورثه ياسين وانت يا بطل تعا اقنع الكفيل والورثه بأنك اشتريت المعده وعم تدفع اقساطها

ولذالك اطلب من كل شخص اشتره معده من مستر ياسين وفورا اليوم قبل بكره ياخذ العقد الي معه ويسأل عن الكفيل(الشركه الي مسجله فيها المعده) ويقابله ويعمل معه عقد ثاني لانو حرام يروح عليك كلشي بعد التعب

وانا اقول وهو حديث لرسول الله (قليل دائم خير من كثير منقطع) او كما قال رسول الله

* وأخير للعلم تره 99 بالمئه من الشباب الي عندهم كريدارات بالأمارات (اقساط ياسينيه) واكترهم اموره الماليه صعبه شوي

طبعا انا ما عم اذكر هذا الشي انتقاصا من شباب الفرقلس ب الأمارات ب

العكس اتمنه اشوف الشباب موفقين وامورهم الماليه جيده وسلامتكم .

شكرا اخ فارس على التوضيح

المشكلة ان اكثر من تملكوا الكريدرات بالبلد سلكوا نفس الطريق

ومثل ما بيقول المثل (اذا جنو ربعك عقلك ما بينفعك)

نرجو من الله ان يوفق الجميع

وشكرا مرة ثانية على التوضيح

كل الشكر للأخ فارس على التوضيح

اقتباس :: وهو حديث لرسول الله(ص) (قليل دائم خير من كثير منقطع) او كما قال رسول الله

انا مع هذا الرأي

تحياتي الك يا ابن البلد وانت قلت

اقتباس :: ومثل ما بيقول المثل (اذا جنو ربعك عقلك ما بينفعك

وانا عندي مثل اخر وهو *اذا رأيت نفسك داخل القطيع فخرج فورا

طبعاً انا راح اتدخل او اعتبر نفسي عندي المام بهل الموضوع ان كان با الامارات او باالكويت او عكس ما ذكر بعض الاخوان بالنسبة للاقساط او ما شابه والاستناد على بعض ا لامثلة الحياة بدها مغامرة او بدها قوية قلب او طبعاً توفيق من رب العالمين وكثير من الشباب غامرو او صارو بس يصير هل شي بتعرف الفرق بين الساقية الجارية والنهر المقطوع

اقتباس :: وكثير من الشباب غامرو او صارو بس يصير هل شي بتعرف الفرق بين الساقية الجارية والنهر المقطوع

وكتير كمان من الشباب اخر الشهر ما معو يدفع القسط وبيظطر يبيع ب الرخص حتى ما تنسحب منو الماكينه ويخسر الاول والاخر

* كل الشكر إلك يا شيخ العرب على مرورك الطيب ؟؟؟؟؟؟؟؟

* أما الأخ فارس بالنسبة للأسعار والأنواع ووووو الخ ربما يوجد مغالطات فيما
كتبت أنا وجزاك الله كل الخير على التوضيح لكن أنا بصراحة طرحت هذا الموضوع
للمشاورة مع الجميع للتأكد من (((( تحليل أو تحريم )))) عملية الشراء من بدايتها
وقبل الخوض في تفاصيل النوع والسعر وطريقة التقسيط , وأكيد ليس بخافي على أحد
ما يترتب على موضوع ( الربــــــــــــــا ) أو الإستفادة بفائدة , ونرجو من أصحاب
الشأن التكرم علينا وتقديم مداخلاتهم بعد مشاورة أهل العلم .
"فاسألوا أهل الذكر أن كنتم لا تعلمون" وأنا صراحة لا أعلم وأتنمنى تدخل أهل الذكر

* لكن بنفس الوقت أتقدم ببعض النقاط اللتي سمعتها في برنامج " الوسطية " للدكتور
طارق السويدان جزاه الله كل خير على قناة الرسالة , وفيها بعض التوضيح لعمليات
الشراء من البنوك الإسلامية , أو المعاملات التجارية بين المعاقدين :

- هناك ثلاث أنواع من العقود بين المتعاقدين هي كما يلي بالتوضيح :
الأول والثالث للاستفادة العامة لكن العقد الثاني هو لموضوعنا ( شراء المعدات )

* العقد الأول , وهو عقد المضاربة :
- العقد بين زيد وعمر من زيد رأس المال ومن عمر الأتعاب لتنفيذ المشروع , الأرباح
بنسبة يتم الاتفاق عليها , والخسارة على زيد صاحب رأس المال وعمر لا يخسر سوى
ما خسره من التعب ولا يتحمل أي خسائر مادية .

* العقد الثاني , وهو عقد المرابحة :
- وهو الموجود بين أيدينا أي ( عقد شراء المعدات الخاضع للنقاش هنا )
لكن الشرط الأساسي فيه أن يكون البائع مالك لهذه المعدة أو بمعني أصح هنا في
الإمارات ( الملكية ) وهي في سوريا أوراق السيارة مكتوب عليها .
- المالك : يكون هو نفسه من باعك المعدة سواء كان بنك أو شركة
ولا تكون المعدة مرهونة في خانة الرهن على الملكية ذاتها , وإذا تأخرت في دفع أحد
الأقساط لا يزيد (درهم واحد على ثمن المعدة ) مع توضيح أسباب تأخير القسط وتعهد
خطي بعدم تكرار التأخير وفي حال تكرار أو استمرار التأخير بالأقسام يحق للجهة
المالكة للمعدة إيقافها عن العمل وطرحها بالمزاد العلني دون سابق إنذار . وفور عملية
الشراء تحق لك إقامة فورية ( في دول الخليج ) عكس ياسين ربما تبقى سنوات تجدد
كرت الزيارة مع وعود وهمية بإقامة وإن حصل فتكون بمهنة عامل وليس سائق

* العقد الثالث : عقد السلم :
- أدفع ثمن السلعة ( سيارة مثلاً ) وأستلمها بعد سنة أو أكثر .
وهي الحالة الموجودة في عقود شراء سيارات موديل السنة أو السنة القادمة وهذا
الموديل غير موجود حالياً بنتظار استيراده من الدولة المصنعة , وهذا الأمر ملموس في
دول الخليج عموماً ونتحدث هنا عن الإمارات وتحديداً رؤوس التريلات الحديثة وتحديداً
اليوم موديل 2008 نوع أول + موديل 2009 .
وفي هذا العقد يشترط تحديد المواصفات بأوراق ومستندات خطية وتحديد السعر حتى
لو تغير السعر في وقت التسليم المحدد

* العقد المحرم - عقد التورق :
بالرجوع لزيد وعمر في تعاقدهما هنا العقد مفصلاً , زيد يشتري سيارة عمر
ثمن سيارة عمر هو 90 درهم كاش يشتريها زيد بــ 100 ألف درهم أقساط يعني
بزيادة 10 آلاف درهم , لكن المشتري ( زيد ) لا يملك أي درهم واحد . بعدها
يطلب زيد من عمر شراء السيارة منه وهي سيارته بالأساس فيشتريها مني بــ 10 آلاف
درهم أي تعود السيارة لصاحبها ( عمر ) ويصبح مع زيد 90 ألف ثمن السيارة
وعليه تسديد الـ 90 ألف لعمر لكن سيعيدها 100 ألف وهذا العقد يسمى بيع العينة
وهو محرم تحريم قطعي لأنه سحب مال وإعادته بالفائدة لكن بطريقة ملتوية

* مع التحية للجميع ,,,,,,,,,,,,,,,,,,,,,

سيدي الكريم انا لم يعجبني الموضوع بكثر ما اعجبتني كلماتك المنتقة وبدقه وتمرس

قولكو راح تدخل الفرقلس كتاب جنس بعدد الكريدرات التي يملكها اولاد الفرقلس قرآءة

و الله يا تشالنجر ثيريك مانك سهل

و عندك ما شاء الله خبرة طويلي

الله يجزيك الخير

اهل الفرقلس ماعندهم غير هالمصلحة حاولوا تغيروها يلعن ابو الكريدرات
كل واحد بقضي عمرو عالكريدر وبصير معو الديسك بضهروا وبقوم بسحب ابنوا لعندوا وبعلموا على كريدر كمان .
حاولوا تشتغلوا بشي مصلحة نضيفة ولا مابصير لازم تبقوا غاطسين بالشحم والزيت كل العمر

الموضوع وقف؟؟؟؟؟الظاهر سباق تسلح الكريدرات انتهى او انتهى الشوط

تصفيق

السيد فارس بعد التحية والاحترام هذا الكلام الذي قلته في بداية الموضوع هو كلام كتب لك لكي تكتبه في الانترنت او في الموقع تحديدا على كل حال انا اليبوم فضيت لحتى اتابع بعض المواضيع وارجو ان تنقل هذه الرسالة لكاتب المقال الاساسي وتباغه تحياتي (كلمك هو تكسير للمقاديف وهذا الاكلام عيب ولو كان الكلام الذي كتبته ما كان اللي ملاك الكلام عنده عدد من الكريدرات وكلها من عند ياسين و بعد قوانين معروفة في دولة الامارات كتب هذا الكلام وبعتك تكتبه والباقي في العدد القادم

علقت حيهن

بالنسبة للخليج فمصلحة الكريدرات احسن من غيرهااا بكتير
يعني واحد غير متعلم شو بدو يشتغل مدير بنك مثلااا
يا اخي يعني بضل وضع اهل البلد والسوري تحديدة مصلحتوا احسن مصلحة
يعني احسن من جنسيات تاني
والي موا عاجبتوا هل مصلحة يحكي بمصلحه تاني
انا شب اساتني باول الطريق
يا خد بايدي
ويدلني على الطريق الصحيح

شكراً من جديد لكل من شارك بالموضوع

مع التحية لكل رأي سلبي أو إيجابي

لكن رجاء خاص من ابو جراح تحديد شي يستحق الرد لأني ما فهمت شو المطلوب

اول شي السلام عليكم وتاني كل عام وانت بخبر
انا بدي اسالك مين اللي عطاك المعلومات عن الغريدر وانواعه وكيفية شرائه لانو احنا في الفرقلس ما فينا غبر بالحكي وتكسير المقاديف للشباب اللي عم يشتغلو بالمعدات والحقيقة يا سيدي اكثرنا ما منحب الخير لحالنا فشلون الغريب او لغيرنا وعلى فكرة انا من الموجودين في الامارات واعرف المعلومات الحقيقية عن موضوع شراء الغريدرات الياسينية ولو ان كلامك وكلام فارس صحيح ما كان ولاد البلد صار عندهن كل واحد غريدر واتنين وكلها من عتد الحج ياسين
انا عندي كلمة بدي اقولها لكل اللي اشترى معدات بالاقساط من ياسين وغيره ونصيحة لكل اللي بدو يشتري جديد (ومن يتهيب صعود الجبال يبقى ابد الدهر بين الحفر) وسلامتكم
ارجو من جميع المساهمين في هذا المنتدى التاكد من اي موضوع يكتب والاهتمام بمصداقيتو والاستفسار عنه بشكل كامل قبل وضعه في المنتدى لانو الشغلي مو صف حكي وبس مشكورين وما قصرتو

اقتباس :: انا عندي كلمة بدي اقولها لكل اللي اشترى معدات بالاقساط من ياسين وغيره ونصيحة لكل اللي بدو يشتري جديد (ومن يتهيب صعود الجبال يبقى ابد الدهر بين الح

فر)

اقتباس :: رجو من جميع المساهمين في هذا المنتدى التاكد من اي موضوع يكتب والاهتمام بمصداقيتو والاستفسار عنه بشكل كامل قبل وضعه في المنتدى لانو الشغلي مو صف حكي وبس

الحقيقة شكراً جزيلاً على تعليقك الظريف مع أنو ردي متأخرلكن كوني صاحب المشاركة بحقوق حصرية توجب علي الرد على مشاركتك المميزة أول باشتان :
موضوع الشراء بالأساس هوي واقع وليس خيال وليس من]نسج الذاكرة , وأنا كتبت مستند على وقائع ملموسة طبعاً مع بعض الأخطاء بالأسعار

ثاني باشتان :
كل واحد من البلد صار عندو كريدر واثنين هذا كلام عم
نسمعوا كثير هالأيام لكن واقع الحال يا صديقي أنو الأقساط
كسر ظهر الرجال وإذا بتحب بعطيك أرقام تلفونات شباب
فاتت بستميت حيط من ورا الأقساط , ونحنا ما تهيبنا صعود الجبال بقدر ما تهيبنا الغوص بالمجهول , بدون إطالة إذا معك
تشتري كاش أهلاً وسهلاً ما معك إلزم حدك ولا تتعدى
وإذا إنت كتبت
( من يتهيب صعود الجبال يبقى أبد الدهر بين الحفر )أنا بجاوبك بكلام اللي ما بعده ولا قبله كلام
( يمحق الله الربا ويربي الصدقات ) ( ص )
والكيس من دان نفسه وعمل لما بعد الموت , والعاجز من
أتبع نفسه هواها وتمنى على الله الأماني
ولا يوجد شي على وجه الأرض يبرر ما يحدث ,,,,

* سباق تسلح الكريدرات في دولة الإمارات :

* سباق تسلح الكريدرات في دولة الإمارات :

مواضيع مماثلة

مواضيع مماثلة